Onun ötən ilin sentyabrında 85 yaşını qeyd edəcəkdik. Lakin taleyin amansız küləkləri martın 2-də Arif Səfanı da sıralarımızdan apardı. Bizə elə gəlir ki, mübariz və nəğməkar şair yenə sıralarımızdadır. Hər tədbirimizin daha canlı və maraqlı keçməsi üçün söz boxçasını açır, oradan təp-təzə dürlərindən çıxarıb xırdlayır, könüllərimizi oxşayır. Biz mövzuya vəfatının ili ərəfəsində qayıdacağıq. Amma elə bilirik ki, 1929-cu ildə Aşqabadda anadan olan, Seyid Əzim Şirvaninin ana tərəfdən nəticəsi, “21 Azər” inqilabının şahidi, Gənclər Təşkilatının fəaliyyətində iştirak edən, daim səmimiyyəti, firqəmizə qəlbən bağlılığı ilə seçilən, bu məhəbbəti poeziyasında, həmçinin şəxsi davranışında əyani göstərən Arif Səfamıza qalan bir borcumuzla da ödəməliyik. Təqdim edəcəyimiz “Azadlıq” şeiri “Səhv edirəm bəlkə də” və “Qəzəllər və gözəllər”, “Seyid Əzim Şirvaninin nəvəsi Səadət xanımın “ağlı-qaralı günləri” kitabları müəllifinin zəngin yaradıcılığının aparıcı xəttininin nümunələrindəndir. Söz vermişdik dərc edəcəyik, ruhu şad olsun!
Azadlıq
Bu azadlıq nədir ki
Ona bağlanmışıq biz?
Ona qovuşmaq üçün
Yanıb, dağlanmışıq biz.
Bu yolda gəncliyimiz
Yaşa doldu, qocaldı,
Yenə azadlıq eşqi
Könlümüzdə ucaldı.
Bu azadlıq nədir ki,
İnsan onun yolunda
Zindanlara atılır,
Əsir tək sürgün olub,
Zülmətlərə qatılır?
Bu azadlıq nədir ki
Sinəmizə həkk olub,
Köksümüzdə çırpınan
İkinci ürək olub?
Bu eşqi, bu sevgini
Hansı meyarla ölçək?
Bu sevdadan biz necə
Üz çevirək, əl çəkək?
Bu azadlıq nədir ki
O bizi gecə-gündüz
Üsyanlara səsləyir?
Dönüb coşqun dənizə
Bu azadlıq nədir ki
Onun parlaq üzünə
Heçkəs ləkə vurammaz,
Onun açıq alnına
Qara kölgə salanmaz.
Bu azadlıq nədir ki
Onu dərk edənlərin
Gücü, qüdrəti artır,
Ömrü, izzəti artır?
Bu azadlıq nədir ki
Onun hər gəlişindən
Qoşalaşır nəğmələr.
Coşub, daşır nəğmələr?
Bu azadlıq nədir ki
Onun hər gəlişindən
Uçub, gedir dumanlar,
Batıb yerin dibinə
Qaranlıqlar, yalanlar.
Bu azadlıq nədir ki
Onu sevməyənlərin
Gözündə həyat sönür,
Ürəyi daşa dönür?
Mənim azadlığımı
Sürgünə göndəriblər
Neçə-neçə ölkəyə,
Başıma döyə-döyə,
Üzümə söyə-söyə.
Bu azadlıq nədir ki
Onun təkrar deməkdən
Yorulmayır dilimiz?
Onun zirvələrinə
Bu gün çatmır əlimiuz,
Nədən çatmır əlimiz?