“Dünya Azərbaycanlı Gənclərinin Beynəlxalq Həmrəyliyinə Dəstək” İctimai Birliyinin sədri Tofiq Əlizadə bildirib ki, Nazim Rizvan 1997-ci ildə onun sədrlik etdiyi təşkilatın himninin sözlərini yazmışdır. T. Əlizadə Nazim Rizvanla uzun illər etdiyi dostluqdan, onunla bağlı xatirələrdən danışıb.
İki şəhid anası Dürnisə Əliyeva çıxışında Nazim Rizvanın “Yarımçıq vüsal” kitabının onu hədsiz təsirləndirməsini, çünki özünün də yarımçıq vüsal kimi acı tale yaşamasını göz yaşları ilə bildirib. Dürnisə Əliyeva həmçinin, Nazim Rizvanla bağlı xatirələrini də tədbir iştirakçılarına danışıb.
Şair-publisist Şahlar Baba, “Qlobal Dünya Müasir Azərbaycan” birliyinin təsisçisi Səbinə Babayeva şerlər söyləyiblər.
Sinra söz İranlı Mühacirlər Cəmiyyətinin təmsilçilərinə verilib. İMC sədri, əməkdar jurnalist Rəhim Hüseynzadə bildirib ki, onun internet resurslarındakı materialllarda bioqrafiyası işıqlandırılarkən nədənsə İranlı Mühacirlər Cəmiyyətinin Cavanlar Təşkilatında çalışdığı 5 il nəzərdən qaçırılıb. Halbuki fədai balası N.Rizvanın ictimai fəaliyyətindəki ən mənalı və səmərəli dövrlərdən biri də həmin 5 ildir. R. Hüseynzadə həmyaşıdının hələ tələbəlik illərindən aktivliyi ilə fərqləndiyini, Neftçalanın rayon qəzetində şöbə müdiri işlədiyi bu müddətdə 20-dək şeirini çap etdirdiyini deyib. Nazim Rizvanı duyumlu, istedadlı yazar kimi dəyərləndirib. Onun ön söz yazdığı görkəmli şair Əli Tudənin “Seçilmiş əsərləri”nin 8-ci cildində gedən rəyinin ən gözəl publisistik material olduğunu vurğulayıb.
R. Hüseynzadə kitabı və rəyin dərc olunduğu “Mühacir” qəzetinin nüsxələrini kitabxanaya və N. Rizavanın yaxınlarına təqdim edib.
İranlı Mühacirlər Cəmiyyəti Ədəbi Birliyinin sədri, Dədə Qorqud Beynəlxalq mükafatı laureatı, şair Tariyel Ümid N. Rizvanın onun məşğələlərini apardığı dərnəyin aktiv üzvlərindən olduğunu deyib. Ötən əsrin 70-ci illərində İMC-də keçirilən tədbirlərin təşkilindəki xidmətlərini yada salıb. Şairi o dövr Azərbaycan gəncliyinin təkrarsız nümayəndələrindən olduğunu diqqətə çatdırıb.
Cəmiyyətin üzvü Azərbaycan Dövlət Pedaqoji Universitetinin professoru Həcər Hüseynova (Umani) “Yarımçıq vüsal” kitabının kökləri Arazın o tayına bağlı hər bir şəxs üçün dərin təəssüratlar bağışladığını deyib. Nazim Rizvanı şeirlərində Azərbaycan dilinin zənginliyindən, incəliklərindən ustalıqla faldalanıldığını konkret misallarla şərh edib.
Tədbirdə həmçinin, tarixçi-tədqiqatçı, BDU-nin müəllimi Nazim Tapdıqoğlu, “Krım Azərbaycan Qobustan Proqramı”nın redaktoru Həbib Əliyev, Respublika Qadınlar Cəmiyyəti Yasamal rayon şöbəsinin sədri Gülnarə Əmirquliyeva, ADPU-nun professoru Ramil Əliyev, ATV kanalının əməkdaşları Səriyyə Kərimova, Rüfət Məmmədov, Xuraman Kərimova, ADU-nun laborantı Kürsümxanım Tahirli, Nizami Gəncəvi adına Ədəbiyyat İnstitutunun dosentləri Leyli Əliyeva, Zərifə Mirzəyeva, Zəminə Zeynalova, Sabunçu rayonu 187 saylı orta məktəbin müəllimi Günel Ələsgərova, 293 saylı məktəbin müəllimi Ülkər Rizvanova, əczaçı Aybəniz Vəkilova və Nazim Rizvanın yaxın qohumları da iştirak edirdilər.
Tədbirdə Nazim Rizvanın xatirəsinə həsr olunmuş qısa metrajlı film nümayiş olundu.
Cəfər Cabbarlı adına Respublika Gənclər Kitabxanasında 30 may 2018-ci il tarixdə şair, ədəbiyyatşünas, yazıçı, tərcüməçi Nazim Rizvanın “Yarımçıq vüsal” kitabının təqdimatı keçirildi. Tədbirdə N. Rizvanın 1973-1978-ci illərdə çalışdığı İranlı Mühacirlər Cəmiyyətinin təmsilçiləri də iştirak ediblər.
Mərasimi giriş sözü ilə kitabxananın direktoru Tahir Sadıqov açıb Nazim Rizvanın həyartı, ədəbi fəaliyyəti haqqında məlumat verərək bildirib ki, o, bədii yaradıcılığa 1963-cü ildə “Göy-göl” şeri ilə başlamış, ilk mətbu şeri 1967-ci ildə Azərbaycan Demokrat Firqəsinin organı olan “Azərbaycan” qəzetində dərc olunmuşdur. Bundan sonra “Çinar pöhrələri”, “Odlu misralar”, “Azərbaycan”, “Yaşıl budaqlar”, “Yeni səslər” ədəbi almanaxlarında, qəzet və jurnallarda çıxış etmişdir. Azərbaycan, İran, Türkiyə, Almaniya, həmçinin İsveçin qəzet və jurnallarında şerləri dərc edilmişdir. Nazim Rizvan həmçinin, 4 cildlik “Cənubi Azərbaycan ədəbiyyatı antologiyasi”nda tərtibçi, 3 cildlik “Şəhriyar. “Əsərləri” kitabında tərcüməçi-redaktor olmuşdur.
Filologiya elmləri doktoru, yazıçı, Nazim Rizvanın “Yarımçıq vüsal” kitabının tərtibçisi Esmira Fuad poemanın əsas dil xüsusiyyətləri, bədii təsvir vasitələri, neçə hissədən ibarət olması haqqında geniş məlumat verib. Nazim Rizvanın Şah İsmayıl Xətaiyə olan sonsuz sevgisini dilə gətirib.
